نمبرسات: زنا کو یہ کہہ کر جائز قرار دینے کی کوشش کرنا کہ زنا تو بالجبر ہی ممنوع ہونا چاہیے، جس میں دوسرے کی رضا مندی کے بغیر یہ کام ہوتا ہے اور جب وہ عاقل و بالغ لڑکا اور لڑکی آپس میں بخوشی راضی ہوں، تو ان کے باہم ملنے میں کیا قباحت ہے، جیسے بائع اور مشتری بخوشی راضی ہوکر بیع کا معاملہ کرنا چاہیں، تو کوئی حرج نہیں ہے۔

حالاں کہ زنا کی ایسی بہت سی شکلیں آج معاشرے میں رائج ہو رہی ہیں، جن کو زنا ہونے کے باوجود بھی زنا نہیں کہا جاتا، مثلاً طلاق دینے کے بعد بھی اکٹھے رہنا اور ’’ ایک مجلس میں تین طلاقوں‘‘ کا ایک ہی طلاق کا فتوی لے کر  اس کو ایک ہی سمجھنا اور اس کے بعد ساری زندگی اس حرام کاری میں مبتلا رہنا، یہ سب ایسی شکلیں ہیں، جن کی آڑ میں زنا، بدکاری معاشرے میں رائج ہوتی جارہی ہیں۔

نمبرآٹھ: موسیقی، میوزک، گانا بجانا سب ناجائز ہے ، اس کے باوجود ان سب کو ’’ روح کی غذا‘‘ کا نام دیا جانا اور ستم بالائے ستم یہ کہ ان غلیظ اور بدبودار چیزوں کو نعتوں، اسلامی نظموں اور دینی پروگراموں کا حصہ بنا نا انتہائی بیہودہ اور نازیبا حرکت اور دین و شریعت کی تذلیل ہے۔

نمبرنو: ٹی وی جو کہ تصویر بینی، فحاشی و عریانیت کے فروغ اور ذہنی تخریب کا سب سے مؤثر اور بڑا ذریعہ ہے اور جس کے روز افزوں مضرتوں اور مفاسد سے کوئی عقل سلیم کا پیکر انکار نہیں کر سکتا، اس کے باوجود یہ کہنا کہ آخر اس میں کیا قباحب و شناعت ہے، حالات حاضرہ سے باخبر رہنا چاہیے ، اس میں دینی و اصلاحی پروگرام بھی تو آتے ہیں۔

نمبردس: دھوکہ دہی، جھوٹ اور فریب، جس کا قرآن و احادیث کے اندر اتنی واضح طور پر ذکر کیا گیا ہے کہ اس میں کچھ کہنے کی ضرورت نہیں، لیکن اسے مجبوری، ضرورت اور کمانے کا ذریعہ کہہ کر جائز کرنے کی کوشش کرنا اور بے جا دلیل دینا کہ اس کے بغیر کاروبار نہیں چل سکتا، معاشرے میں سچے اور امانت دار تاجر کو ایک ناکام تاجر قرار دیا جاتا ہے، اس لیے اس بارے کچھ نرم رویہ اختیار کرنے کی ضرورت ہے۔