اسلام خشک مذہب نہیں ہے، نہ وہ جسمانی اور ذہنی تفریحات کے خلاف ہے؛ بلکہ آپ جائز حدود میں رہ کر ہر وہ کام کر سکتے ہیں، جس سے آپ کے قلب و روح کو بھی تسکین ملے اور جسم کو بھی طمانیت کا احساس ہو۔
اسلام نے سال بھر میں عید کے صرف دو دن مقرر کیے ہیں، ایک: عید الفطر تو رمضان المبارک کی عبادات فاضلہ صوم و صلوۃ وغیرہ کی انجام دہی کے لیے توفیق الہی کے عطا ہونے پر اظہار تشکر و مسرت کے طور پر منائی جاتی ہے ۔
دوسرا: عیدا لاضحی اس وقت منائی جاتی ہے، جبکہ مسلمانان عالم کی ایک عظیم الشان اجتماعی عبادت یعنی حج کی تکمیل کر رہے ہوتےہیں اور ظاہر ہے کہ عبادات کے اختتام اور انجام پانے کی خوشی کوئی دنیوی خوشی نہیں ہے، جس کا اظہار دنیاوی رسم و رواج کے مطابق کرلیا جاتا ہے، یہ ایک دینی خوشی ہے اور اس کے اظہار کا طریقہ بھی دینی ہی ہونا چاہیے، اس لیے اس میں اظہار مسرت اور خوشی منانے کا اسلامی طریقہ یہ قرار پایا کہ اللہ تعالی کے حضور سجدہ شکر بجا لایا جائے۔

دنیا کی قوموں کی طرح نہیں کہ اپنے تہوار اور خوشی کے دنوں میں لہو و لعب، ناچ گانے، شراب نوشی اور تفریحات کو پسند کرتے ہیں، اگلے پچھلے رنج و غم اور مصائب کو بھول کر وقتی خوشی میں ایسے سرشار ہو جاتے ہیں کہ انہیں اپنی سدھ بدھ ہی نہیں رہتی۔